ဒီနေ့ ကျနော်ဒီစာစုကိုရေးသားဖို့ Motivated လုပ်ခဲ့တဲ့ အကြောင်းတရားတခု ရှိပါတယ် ။ ဒါကို ဒီမှာ မဖော်ပြ တော့ ပါဘူး ၊ နောက်တခါ သားသမီး(၃)မျိုးစလုံးကို ထင်ရှားတဲ့သာဓကတွေနဲ့ ရေးပြဖို့အကြံရှိပေမဲ့ အတုယူ စရာကောင်းတဲ့ သားသမီး(၁)မျိုးအကြောင်းကိုပဲ အကျယ်တ၀ံ့ ဥပမာပေးရှင်းပြပါတော့မယ် ။ ကျန်နှစ်မျိုးကို အနှစ်ချုပ်သဘောမျှပဲ တင်ပြပါတော့မယ် ။ အကြောင်းကတော့ ကျနော့်ရဲ့ ပုဂ္ဂလဓိဌာန်ရေးချက်တချို့ကြောင့် ဒီစာစုရဲ့ မူလအမှီပြုရာ ဗုဒ္ဓမြတ်စွာဒေသနာတော်ကြီးကို တချို့(ပုဂ္ဂိုလ်စွဲနဲ့) တိုက်ခိုက်ဝေဖန် မလျော်ကန်စကား ဆိုခဲ့ရင် ထိုသူတွေမှာ ကြီးစွာသောအပြစ်ဖြစ်မှာစိုးတာရယ် ၊ မြတ်ဗုဒ္ဓဒေသနာတော်ကြီးရဲ့ သိမ်မွေ့နက်နဲမှုကို ထိခိုက်မှာစိုးတာရယ်ကြောင့် ချန်ထားခဲ့ရတာဖြစ်ပါတယ် ။ (ဥာဏ်ရှိသူ၊ပညာရှိသူတို့ ချဲ့ထွင်စဉ်းစားကြပါကုန်)
ပုံစာမှာ ဗုဒ္ဓမြတ်စွာဘုရားရှင်ရဲ့ ဒေသနာတော်ကို ကောက်နှုတ်တင်ပြထားပါတယ် ။ ခုဒီမှာတော့ ကျနော် နားလည်မိသလို ရေးပြပါရစေခင်ဗျာ ။
လောကမှာ သားသမီး(၃)မျိုးရှိပါတယ် ။(ဒေသနာတော်မှာ သား ဟူသောစကားရပ်သည် ပုတ္တ ဟူသော အနက် အရ သားသမီး အပေါင်းကိုဆိုလိုခြင်းဖြစ်တယ်ဟု နားလည်စေလိုပါတယ်) ။ ထို(၃)မျိုးကတော့ - - -
(၁) အတိဇာတ - အမိအဖတို့ထက် ဂုဏ်လွန်သော(မြတ်သော) သားသမီး
(၂) အနုဇာတ - အမိအဖတို့နှင့် ဂုဏ်တူသော(တူညီသော) သားသမီး
(၃) အ၀ဇာတ - အမိအဖတို့ထက် ဂုဏ်ယုတ်သော(ယုတ်ညံ့သော) သားသမီး ရယ်လို့ (၃)မျိုးကွဲပြားပါတယ် ။
အတိဇာတ သားသမီးအကြောင်းကို ဥပမာနဲ့ အကျယ်ရှင်းပါ့မယ် ၊ ခုတော့ အနုဇာတ သားသမီးနဲ့ အ၀ဇာတ သားသမီးတို့ကြောင်းကို ဓမ္မဓိဌာန်ကျကျ အရင်ရှင်းပါရစေ ။
အနုဇာတသားသမီးဆိုတာ မိဘတို့က ရတနာ(၃)ပါးကိုးကွယ်တယ် ၊ သီလလုံခြုံတယ် ၊ ကောင်းမြတ်သော စိတ်ထားရှိတယ် ။ ထို့အတူ သားသမီးတို့ကလဲ မိဘတို့နဲ့ထပ်တူ ရတနာ(၃)ပါးကိုးကွယ် ၊ သီလလုံခြုံပြီး ကောင်းမြတ်စိတ်ထားရှိတဲ့ ဂုဏ်ရည်တူသားသမီးကို ခေါ်ပါတယ် ။ ချဲ့ထွင်ပြောရမယ်ဆိုရင် မိဘဂုဏ်ကို စောင့်ထိန်းသူ ၊ မိဘတို့ရဲ့မြတ်သောအကျင့်ကိုစောင့်ထိန်းသူ ၊ မိဘတို့ရဲ့ မြတ်သောမျိုးနွယ်ကို စောင့်ထိန်းသူ တို့ဟာ မိဘတို့နဲ့ တူညီတဲ့ အနုဇာတသားသမီးလို့ ခေါ်ဆိုနိုင်ပါတယ် ။
အ၀ဇာတသားသမီးကတော့ မိဘတို့က ရတနာ(၃)ပါးကိုးကွယ်ပေမဲ့ သူက မကိုးကွယ် မရိုသေဘူး ၊ မိဘတို့က သီလလုံခြုံပေမဲ့ သူက မလုံခြုံဘူး ၊ မိဘတို့က ကောင်းမြတ်သောစိတ်ထားနဲ့ ကောင်းမြတ်သောအမူအကျင့်တွေ ရှိခဲ့ပေမဲ့ သူကတော့ ယုတ်မာသောစိတ်ထား ၊ ယုတ်ညံ့သောအမူအကျင့်တွေရှိပါတယ် ။ တနည်းပြောရမယ် ဆိုရင် မိဘဂုဏ်ကိုဖျက်ဆီးသူ ၊ မိဘတို့ရဲ့မြတ်သောအကျင့် မြင့်မြတ်သောစွမ်းဆောင်ရည်တွေကို ဖျက်ဆီးသူ ၊ မိဘတို့ရဲ့ မြတ်သောမျိုးနွယ်ကို ဖျက်ဆီးသူ - ဒီလိုသားသမီးတွေဟာ ( ကမ္ဘာကျော်ရင်ကျော်ပါစေ ၊ ဘွဲ့ထူး ဂုဏ်ထူးတွေရရင်ရပါစေ ) မိဘတို့ထက် ယုတ်ညံ့တဲ့ အ၀ဇာတ သားသမီးပါပဲ ။
ဒီနေရာမှာ ကောင်းမြတ်တဲ့ ဘယ်ဘာသာမှာမဆို ကိုယ်ကျင့်တရားကောင်းမွန်ပြီး မြတ်သောစိတ်ဓါတ် ၊ မြတ် သောအကျင့်ရှိတဲ့ မိဘတွေရဲ့ဂုဏ်ကို ထိန်းသိမ်းစောင့်ရှောက်ပြီး မိမိကလဲ ကိုယ်ကျင့်တရားကောင်းမွန် ၊ မြတ်သောစိတ်ဓါတ်၊ မြတ်သောအကျင့်ရှိမယ် ဆိုရင် အနုဇာတ သားသမီးဖြစ်ပြီး ၊ မိဘတွေလို ကိုယ်ကျင့် တရားကောင်းမွန်ခြင်းမရှိ ၊ ယုတ်မာသောစိတ်ဓါတ်၊ ယုတ်ညံ့သောအကျင့်ရှိမယ် ၊ မိဘတို့ရဲ့ ဂုဏ်သိက္ခာ၊မျိုးရိုး ကို ချိုးဖောက်ဖျက်ဆီးမယ် ဆိုရင် ယုတ်ညံ့တဲ့ အ၀ဇာတသားသမီးပဲ ဖြစ်မှာပါ ။
ခု မိဘတို့ထက် ဂုဏ်လွန် (မြတ်သော) သားသမီးအကြောင်းကို ရှင်းပါ့မယ် ။ မိဘတွေဟာ ရတနာ(၃)ပါး မကိုး ကွယ်ဘူး ၊(တနည်း) မှားယွင်းသောမိစ္ဆာအယူကို ယူတယ် ၊ သီလမလုံခြုံဘူး (သူ့အသက်သတ်တယ် ၊သူတပါး စည်းစိမ်ဥစ္စာကိုခိုးတယ် ၊ သူများသားမယားစော်ကားတယ်(မုဒိန်းကျင့်တယ်) ၊ လိမ်ညာလှည့်ဖြားတတ်တယ် ၊ အရက်သေစာသောက်စားတယ် ၊ ယုတ်မာသောစိတ်ထားရှိတယ် ။ ဒါပေမဲ့ သားသမီးကတော့ ရတနာ(၃)ပါး ကိုးကွယ်တယ် ၊(တနည်း)မှန်ကန်သော သမ္မာဒိဌိဥာဏ်အမြင်ရှိတယ် ၊ သီလတွေ လုံခြုံတယ် ၊ ကောင်းမြတ် သော စိတ်ထားရှိတယ် ၊ (တချို့ဆို) မိဘတွေရဲ့ မှားယွင်းသောအယူကိုတောင် တည့်မတ်မှန်ကန်စေခဲ့တယ် ။ ဒီလိုသားသမီးမျိုးတွေဟာ မိဘထက် ဂုဏ်သာလွန်သော မြတ်သော အတိဇာတသားသမီးတွေလို့ ခေါ်ဆိုရမှာ ဖြစ်ပါတယ် ။ ခု မိခင်ကြီးရဲ့ မှားယွင်းတဲ့အယူကိုတောင် တည့်မတ်ပေးနိုင်ခဲ့တဲ့ အတိဇာတ သားကြီးတယောက် ရဲ့ ဇတ်လမ်းအကျဉ်းကို အတုယူစရာ သာဓကဆောင် ပြပါရစေခင်ဗျာ ။
မြတ်စွာဘုရားရှင်လက်ထက်တော်က ပညာအရာမှာ ဘုရားကလွဲရင် အမြတ်ဆုံး ဧတဒဂ် ရတော်မူတဲ့ လက်ျာရံ အရှင်သာရိပုတြာ ကိုယ်တော်မြတ်ကြီးဆိုရင် ဗုဒ္ဓဘာသာဝင်တိုင်း သိကြမှာပါ ။ မြတ်စွာဘုရား နတ်ပြည်မှာ ၀ါတွင်း(၃)လပတ်လုံးဟောကြားခဲ့တဲ့ အဘိဓမ္မာတရားတော်ကြီး ၊ ခု ကျနော်တို့ လေ့လာရွတ်ပွားပူဇော်နေရတဲ့ (၂၄)ပစ္စည်းမဟာပဌာန်းကျမ်းတော်ကြီးတွေဟာ မြတ်ဘုရားက အရိပ်အမြွက်မျှဟောခဲ့တာကို ရှင်သာရိပုတြာ ကိုယ်တော်မြတ်ကြီး ပြန်လည်ဟောကြားခဲ့လို့ သိနေရတဲ့တရားတော်ကြီးတွေပါ ။ ဒီလို ရဟန္တာကိုယ်တော်မြတ် ကြီးရဲ့ မယ်တော်ကြီးကတော့ ကိုယ်တော်မြတ်ကြီးပရိနိဗ္ဗာန်စံခါနီးအချိန်ထိ မှားယွင်းသော မိစ္ဆာအယူကို ယူနေ သေးတဲ့ သာရီပုဏ္ဏေးမကြီးပါတဲ့ ။ ဒီနေရာမှာ သားသမီးတွေ သတိချပ်ဖွယ် ပြောခဲ့ချင်ပါတယ် ။ သာရိပုတြာ ကိုယ်တော်မြတ်ကြီးဟာ လူနတ်ဗြဟ္မာတွေ ရိုသေရတဲ့ လက်ျာတော်ရံ ရဟန္တာကြီးဖြစ်ပေမဲ့ မိစ္ဆာဒိဌိ သူ့မိခင် ကြီးကိုတော့ ဘယ်သောအခါမှ မထေမဲ့မြင်ပြုခြင်းမရှိပဲ ရိုသေလေးစားစွာ ဆက်ဆံပြောဆိုစမြဲပါတဲ့ ။ ဒီလိုနဲ့ အတိုချုပ်ရရင် ရှင်သာရိပုတြာ ရဟန္တာမြတ်ကြီးဟာ ဘ၀နေ၀င်ချိန် သွေးဝမ်းရောဂါဖိစီးနှိပ်စက်လို့ ပရိနိဗ္ဗာန် ၀င်စံကာနီးအချိန်မှာ သူ့မိခင်ကြီးအကျွတ်တရားရဖို့ အကြောင်းကို မြင်တဲ့အတွက် မိခင်ကြီးရှိရာကို နာကျင် နေလျက်နဲ့ ခရီးထွက်ခဲ့ပါသတဲ့ ။ သာရီပုဏ္ဏေးမကြီးလဲ သူ့သားလာတာမြင်တော့ ၀မ်းသာအားရ ကြိုဆို ၊ သူ့ သားတော်မောင် သွေးဝမ်းသွားပြီးရောဂါပြင်းထန်နေတာမြင်တော့ ဂရုဏာဒေါသနဲ့ မြည်တွန်တောက်တီးပေါ့ ၊ (တွေ့ပြီလား သားရဟန်းကြီး ၊ နင်ခုလို ရောဂါပြင်းထန် သေမဲ့ဟန်ဖြစ်တော့မှအမေဆီပြေးကပ် ၊ နင့်ဘုရားက ဒါတော့ မကယ်နိုင်တော့ဘူးမလား) စသဖြင့်ပေါ့လေ ။ သူက ဘုရားကို ဘုရားမှန်းမှ မသိသေးတာကိုး ။ အရှင် သာရိပုတြာကိုယ်တော်မြတ်ကြီးကတော့ အေးဆေးသိမ်မွေ့စွာ မိခင်ကြီးကို ပြန်ပြောရှာတယ် ။(မယ်တော်ကြီး ဒီဘ၀ ဒီခန္ဓာရလာသမျှ ဒီလို အိုခြင်း၊နာခြင်း၊သေခြင်းတရားတွေ ကြုံမြဲဓမ္မတာမို့ သားရဟန်းမတုံလှုပ်ပါ ၊ မိခင် ကြီးလဲ စိုးရိမ်ပူဆွေးမရှိပါနှင့်)လို့ ပြောတယ် ။ ဒီလိုနဲ့ ညဦးယာမ်ရောက်တော့ ရဟန္တာကြီးဟာ ဖလသမာပတ် ၀င်စားပြီး လဲလျောင်းနေတယ် ။ မိခင်ကြီးကတော့ အနားက တကြည့်ကြည့်နဲ့ပေါ့ ။ သန်းခေါင်ယာမ်ရောက် တော့ ပြိုးပြက်အရောင်တောက်စွာနဲ့ နတ်သားတွေလာဖူးမြော်ကြတယ် ၊ သိကြားမင်းကြီးရောက်လာတော့ နတ်သားတွေ နောက်ဆုတ် ၊ တခါ ကိုယ်ရောင်ကိုယ်ဝါပိုမိုတောက်ပစွာနဲ့ ဗြဟ္မာမင်းကြီးဆင်းလာတော့ သိကြား လဲ နောက်ဆုတ်ပေးရတယ် ။ ဒီအချင်းအရာတွေကို (ရှင်သာရိပုတြာကိုယ်တော်ကြီး အဓိဌာန်ပြုထားလို့) မိခင် သာရီပုဏ္ဏေးမကြီး အတိုင်းသားမြင်နေရသတဲ့ ။ ဗြဟ္မာကြီးလာတော့ သူတို့ကိုးကွယ်ရာမို့ ပုဏ္ဏေးမကြီး အံ့သြ တကြီး ထိုင်ရှိခိုးတယ် ။ ဒါပေမဲ့ ဗြဟ္မာကြီးက သူ့မမြင်၊ လက်ျာရံကိုယ်တော်မြတ်ကြီးဆီပဲတန်းသွားပြီး ရှိခိုးဦးချ ပူဇော်ကန်တော့နေတာ မြင်လိုက်ရတော့ (အလို - ငါတို့ကိုးကွယ်တဲ့ ဗြဟ္မာကြီးကတောင် ငါ့သားရဟန်းကို ရှိခိုး ရတယ်ဆိုတော့ သူ့ဆရာ ဗုဒ္ဓဘုရားဆို ဘယ်လောက်များ တန်ခိုးကြီးလိုက်မလဲ) ဒီအတွေးနဲ့ အတ္တမာနတွေ လျောကျ ၊ သားရဟန်းကို ကြည်ညိုစိတ်ဝင်လာတယ် ။ မယ်တော်ကြီးရဲ့စိတ်ပြောင်းလဲမှုကိုသိတဲ့ သာရိပုတြာ ကိုယ်တော်မြတ်ကြီးဟာ အဲဒီအခါကျမှ နတ်ဗြဟ္မာတွေနဲ့တကွ မိခင်မယ်တော်ကြီးကိုပါ တရားဒေသနာတွေ ဟောကြားတော်မူပါတယ် ။ တရားတော်ရဲ့အဆုံးမှာ မယ်တော်သာရီပုဏ္ဏေးမကြီးဟာ တဘ၀လုံးမှားယွင်းယူ လာတဲ့ မိစ္ဆာအယူတွေ ကွာကျ ၊ မှန်ကန်တဲ့အသိအမြင်တွေရလို့ ရတနာ(၃)ပါးအပေါ် စွဲမြဲစွာကြည်ညိုသက်ဝင် လာတဲ့ ဗုဒ္ဓဘာသာဝင်အစစ်ကြီး ဖြစ်ခဲ့ပါတော့တယ် ။
ချစ်စွာသော စာရှုသူ ၊ သင် - ဘယ်လိုသားသမီးမျိုး ဖြစ်ချင်ပါသလဲ ။ မိဘထက်မြတ်သောသားသမီး အဖြစ်ကို အလွယ်မရနိုင်ပေမဲ့ စောင့်ထိန်းခြင်းသိက္ခာတို့ဖြင့် မိဘတို့နှင့်တူညီသော အနုဇာတ သားသမီးအဖြစ်ကို ရရှိ အောင်တော့ ကြိုးစားနိုင်ပါတယ် ။ ဒါပေမဲ့ မိဘတွေရဲ့ ယုံကြည်ရာရတနာ(၃)ပါးကို ဖျက်ခဲ့မယ်ဆိုရင် ၊ မိဘ တွေရဲ့ မြတ်သောကိုယ်ကျင့်သီလ၊မြတ်သောစွမ်းဆောင်ရည်၊မြတ်သောဂုဏ်သိက္ခာနဲ့ မြတ်သောမျိုးနွယ်ကို သင်(အလိုဆန္ဒတခုအတွက်) ဖျက်ဆီးခဲ့မယ်ဆိုရင်တော့ ပညာရှိသူတော်ကောင်းတို့ မနှစ်မြို့သော ၊ ကဲ့ရဲ့ ဖွယ်ဖြစ်သော ယုတ်ညံ့တဲ့ အ၀ဇာတသားသမီးမျိုး ဖြစ်ကုန်ကြမှာမို့ မိဘမျိုးရိုးဂုဏ်သိက္ခာ ၊ မိဘတွေရဲ့ ယုံကြည်ရာဘာသာသာသနာကို ဖျက်လိုဖျက်ဆီးမလုပ်မိကြဖို့ သတိပေးလိုက်ပါရစေခင်ဗျာ ။
( ၀ီမံသာ )
No comments:
Post a Comment