ငါက ဘာမှမဟုတ်

ဒီရက်ထဲ ကြည့်လိုက်ရတဲ့ Dr Strange ဆိုတဲ့ ရုပ်ရှင်ကားတကားမှာ ကမ္ဘာကျော်အဆိုအမိန့်တခု(ထင်ပါတယ်)ကို ကိုးကားပြောဆိုသွားတာ တွေ့လိုက်ရတယ် ။ အဲဒါက -

( လောကကြီးက မင်းအတွက် ဖြစ်တည် လည်ပတ်နေတာ မဟုတ်ဘူး ) တဲ့ ။

ဒီစကားက ဗုဒ္ဓရဲ့ စကား ( ယေဓမ္မာ ဟေတုပ္ပပ္ဗဝါ ) ဆီကို ချဉ်းကပ်လာတဲ့ အတွေးအခေါ်ပါတဲ့ စကားတခုပဲ ။

တကယ်တော့ လောကကြီး ဖြစ်တည်လာတာ သူ့အတွက် ၊ ငါ့အတွက် အဲလို ဘယ်သူ့အတွက်မှ မဟုတ်ဘူး ။ အကြောင်းတရားတွေ ပြည့်စုံတိုက်ဆိုင်လို့ ဖြစ်တည်လာရတာ ။ ဒီလိုပဲ ပျက်စီးသွားရတာမှန်သမျှဟာလဲ ပျက်ဖို့ အကြောင်းတရားတွေ ပြည့်စုံတိုက်ဆိုင်လာရင် ပျက်မှာပဲ ။ ( ယေဓမ္မာ ဟေတုပ္ပပ္ဗဝါ ) - (အကြင်တရားတို့သည် အကြောင်းကြောင့်သာလျှင် ဖြစ်ပေါ်လာရကုန်၏) ဆိုတာ အဲဒါပဲ ။

လူအတော်များများဟာ အဖြစ်အပျက် အခြင်းအရာတွေကို ချဉ်းကပ်ရှုမြင်တဲ့အခါ (အတ္တဗဟိုပြုဝါဒ)နဲ့ပဲ ရှုမြင်တတ် ကြတယ် ။ ဒါဟာ တကယ့်အစစ်အမှန်တရားကိုမသိလို့(တနည်း)မရင့်ကျက်သေးလို့ ဖြစ်ရတာပဲ ။

ကျနော် ငယ်ငယ်က ခဏခဏတွေးဖူးတယ် ။ ( ငါဟာ လောကကြီးရဲ့ အပယ်ခံပါ )လို့ ။ ခု သတိရလို့ ပြန်ကြည့်တော့ တော်တော်ရူးသွပ်တဲ့ အတွေးပဲ ဆိုတာ သိလိုက်ရတယ် ။ တချို့ ခုထိ(အသက်ကြီးတဲ့အထိ) တွေးနေကြတာ တမျိုး ရှိသေးတယ် ။ ( ငါက လောကကြီးကို ပေးဆပ်သူပါ ) ၊ ဒိထက် ပိုဆိုးတာက ( ငါက လောကကြီးရဲ့ ကယ်တင်ရှင် )တဲ့ ။ ကိုယ့်ဟာကိုယ် တယောက်ထဲ တိတ်တိတ်ကလေးပြန်စဉ်းစားကြည့်ရင် တော်တော်ရီစရာကောင်းတဲ့ အတွေးတွေဆိုတာ သိနိုင်ပါလိမ့်မယ် ။ အတ္တကိုမှစွဲနေတဲ့ (ဒိဌိဥပါဒါန်)သမားတွေကတော့ သိမှာမဟုတ်ပါဘူး ။ (ဒိဌိဥပါဒါန် - ငါ ၊ သူတပါး စတာတွေကို အစစ်အမှန် ၊ အမြဲထာဝရ ဟု စွဲလန်းနေခြင်း)

အဲဒီတော့ ဘယ်လိုတွေဖြစ်ကုန်သလဲဆိုတော့ -

( ငါက အပယ်ခံ ၊ လောကကြီးက ငါ့အတွက် ဘာမှလုပ်မပေးဘူး ၊ လောကကြီး က ငါ့ကို ဂရုမစိုက်ဘူး ) ဒီလိုအတွေးတွေဖြစ်လာတော့ ဒေါသစိတ်တွေ (သိမ်ငယ်၊နာကျည်း၊ဝမ်းနဲ၊ပေါက်ကွဲ)တာတွေ ဖြစ်ကုန်ကြတာပေါ့ ။ 

တခါ ( ကိုယ်က သူတပါးအကျိုးဆောင်လိုက်တာ သူတပါးအဆင်ပြေသွားရင် ကိုယ့်မှာ ကုသိုလ်အကျိုးဖြစ်တယ် ) ဆိုတဲ့ (ကမ္မနိယာမ)ကို နားမလည်တော့ ( ငါက နင်တို့အတွက် လူဖြစ်လာရတာ ၊ ငါကပဲ ပေးဆပ်နေရတယ် ၊ ငါက လောကကြီးရဲ့ ကယ်တင်ရှင် ) အဲလိုတွေးပြီဆိုတာနဲ့ ( မာန ) က ဝင်လာပါပြီ ။ တချို့ကျတော့ ဒီလိုတွေးတယ် ။ (အမေက ကယ်တင်ရှင်)တဲ့ ။ တွေ့ဖူးကြတယ်မဟုတ်လား -  ( သူကပဲ တလောကလုံးကို လုပ်ကျွေးနေရတယ် ဆိုတဲ့ မျက်နှာထားမျိုးတွေလေ ) ။ တချို့ကျတော့ ပရဟိတ လုပ်တယ် ။ အလှုကြီးအတန်းကြီးပေးတယ် ။ ( ငါဘယ်သူ ) ဆိုတဲ့ နာမည်ကြီးချင်တဲ့ ( လောဘ ) ကြီးက နဖူးမှာ အပြူးသားကြီးနဲ့ ။ သတိထားနော် ။ (ဘုရားဒကာ၊ကျောင်းဒကာတွေ) (ပရဟိတဆရာကြီးတွေ) ။ (လောဘ) ကြီး တန်းလန်းပါနေရင်တော့ တောထဲမှာ ခွေးပိန်မလေး အစာကျွေးသလောက် တောင် ကုသိုလ်ရမှာမဟုတ်ဘူးဆိုတာ ။

ချုပ်ရရင် အတ္တဗဟိုပြု လာရင် ( လောဘ ၊ ဒေါသ ၊ မာန ) စတဲ့ အကုသိုလ်တရားဆိုးတွေ ဖြစ်လာတတ်လို့ ကောင်းတာ လုပ်တောင် ကောင်းကျိုးမရ (တချို့) လူရီချင်စရာ ဖြစ်ရတာ သတိပြုမိကြစေဖို့ - အများ နားလည်အောင် -

( လောကကြီးက မင်းအတွက် လည်ပတ်နေတာမဟုတ်ဘူး ) လို့ ပညာရှိစကားနဲ့ သတိပေးခဲ့တာ ဖြစ်မှာပါ ။

ဒါကြောင့်မို့ -

(လောကအပယ်ခံ)လို့ သိမ်ငယ်စိတ်ဝင်လာရင် -  လောကကြီးကလဲ သူ့အကြောင်းနဲ့သူ ဖြစ်လိုက်ပျက်လိုက် ချာလပတ်ရမ်းနေတာ ၊ ငါကလဲ ငါ့အကြောင်းနဲ့ငါ ( ဘာမှဝမ်းနဲစရာမဟုတ် ) လို့ စဉ်းစားပြီး ဖြေသိမ့်လိုက်ပါ ။

(ငါကကယ်တင်ရှင်) လို့ အခြောက်တိုက်ဘဝင်မြင့် မာန်တက်ချင်နေရင်လဲ - ကိုယ့်စိတ်ကလေး ခဏ ကောင်းကင် (လေယာဉ်ပျံပေါ်တင်ပြီး) ကိုယ့်ကိုယ်ကို ပြန်ကြည့်လိုက်ပါ ၊ ပရွက်ဆိတ်လောက်တောင်မရှိတဲ့ ပိစိညှောက်တောက် ကလေး ဖြစ်နေရှာတဲ့ ( ငါကဘာမှမဟုတ် ) ဆိုတာကိုသိပြီး မာန်မာနတွေ လျှော့ချနိုင်ပါစေလို့ သတိပေးလိုက်ပါရစေ ။

( ဝီမံသာ )      ( 28-7-2017 )

မှတ်ချက် ။         ။ မိမိကိုယ်ကို သတိပေးခြင်းလဲ ဖြစ်ပါသည် ။